القول الفصل في بجاحة رنا و سماجة خديجة الوعل

من زمان يقرقع بقلبي هالموضوع ، بس ما لقيت وقت اكتبه ، أو بالأحرى ما لقيت صياغة معينه لهالموضوع ، و إلى الأن ما لقيت ، بس لأني وصلت حدي من هالأدميتين و خاصة رنا ، فصار لازم اطلع الي بقلبي ، يعني الموضوع هذا يبي يصير سواليف أكثر من ما هو موضوع منسق.

أبسخن أول شي بخديجة الوعل ، بحكم انها مسكينه أرحمها أكثر مما أكرهها ، يعني خديجة الله يصلحها تسمع بشيء إسمه تقديم و تحاول من كل قلبها توصل لقلب المستمع ، بس وش تسوي ، ربي خالقها ثقيلة دم ، بس يؤخذ عليها انها ما استوعبت لسه انها ثقيلة دم ، و بعدين عندها لزمه تقهر في تقديمها ، دايم تدخل عبارة “الدلع و الولع” في كلامها ، مثلا : ” يا مساء الدلع و الولع” ، ” يا صباح الدلع و الولع” ، “يا هلا بك يا دلع و يا ولع ، و روح يا دلع يا ولد ام ولع ، من علمك على رقص الهتشع … ” لا الأخيرة هذي نصبة  من عندي بس دخلت مسرحية سيف العرب في السالفة (لا يا شيخ و الا الناس صدقو !) ، المهم ان اللزمه هذي ما لها سنع ابدااااا . غير كذا خديجة ترتبك اذا اتصل شخص و قال كلام ما تعرف ترد عليه ، يعني اذا قل أدبه أو حتى قال كلام عادي بس هي ما فهمت عليه ، تقعد ساعة كاملة متنحه و مو مركزه و منرفزه على كل المتصلين.

جينا لزبدة الموضوع ، الأخت رنا ،  هذي الأدمية زي ما يقول المثل النجدي ، وجهها مغسول بمرق ، يعني يا ما جاها تهزيء و ياما تشرشحت في الجرايد و المجلات  و على الهواء، و بكل ثقة تطلع و تقدم ، لو انا منها سنة كاملة اقعد بالبيت ما اطلع من كثر التهزيء الي اشوفه ، لا و المشكله شين و قوي عين ، تباجح مع المستمعين و كأن الإذاعة لأبوها ، يعني انا مستغرب من إدارة إم بي سي و على رأسهم الشيخ الوليد الإبراهيم ، كيف يرضون انه وحدة مثل هذي تقدم في الإذاعة و تمثل إم بي سي ، يعني على سبيل المثال لا الحصر ، رنا الله يهدينا و اياها ما عندها اي اسلوب في الكلام مع المستمعين ، ببساطة ممكن تهزئك يا المتصل و تتريق عليك بسبب و بدون سبب ، يعني مرة  سمعتها تتريق على إسم شخص متصل !! نجي لبجاحتها في الرد على المستمعين ، رنا ترد الإساءة بعشره على الهواء ، معروف ان المتصلين عادة فيهم اشخاص تربيتهم على قدهم ، و لازم المذيع يعرف كيف يتجاوز هالأشكال باسلوب راقي ، رنا تجلس على الهواء ترادد المتصل الي يسب و تطلب من الكنترول انه ما يقطع الخط علشان تستعرض للناس طول لسانها ، و أحيانا كثيرة تتمادى في البجاحة أكثر من المتصل ، على سبيل المثال ، بعض المتصلين يتسائل عن سبب عدم بث أغنيته الي طلبها و يلقي باللوم على رنا ، فبدل ما رنا تمتص غضب هالمتصل ، تباجح بأنه انت ما قد طلبت هالأغنية ، أو انه انتم يا المتصلين ما تسمعون الأغاني الي تطلبونها و تحسبون انه احنا ما نحطها ، و تجلس تدخل بجدال عقيم مع المتصل على الهواء ! هذا طبعا غير أسلوبها الطبيعي في التقديم ، يعني حتى وهي طبيعية و تقدم و يقال لها حليله و طيوبه ، اسلوبها و طريقة حكيها كأنها مغصوبه على التقديم و تقرأ المسجات و كأنها متقرفه !

بصراحة بخاطري كلام كثير أقوله عن هالمذيعات و عن إذاعة إم بي سي بشكل عام ، بس ما أبي اقول كل شيء ، ابي اخلي مساحة للنقاش و راح اضيف الي عندي من خلال الردود.

إعذروني أتكلم بالعامية ، بس ما أعرف أهزء أحد بالفصحى